Judg 2 | NdeIBE | STEP | Ingilosi kaJehova yahamba isuka eGiligali isiya eBhokhimi yasisithi, “Ngalikhupha eGibhithe ngaliholela elizweni engafunga ukulinika okhokho benu. Ngathi, ‘Angiyikusephula isivumelwano sami lani,

Judges 2

Ingilosi kaJehova eBhokhimi

1 Ingilosi kaJehova yahamba isuka eGiligali isiya eBhokhimi yasisithi, “Ngalikhupha eGibhithe ngaliholela elizweni engafunga ukulinika okhokho benu. Ngathi, ‘Angiyikusephula isivumelwano sami lani,

2 njalo kaliyikwenza isivumelwano labantu baleli ilizwe, kodwa lizabhidliza ama-alithare abo.’ Kodwa lina kalingilalelanga. Likwenzeleni lokhu na? 3 Ngakho khathesi-ke ngiyalitshela ukuthi angiyikubaxotsha phambi kwenu, bazakuba ngameva emihlubulweni yenu njalo onkulunkulu babo bazakuba ngumjibila kini.”

4 Kwathi ingilosi kaJehova isizikhulumile zonke lezizinto kubo bonke abako-Israyeli, abantu bakhala kakhulu, 5 indawo leyo bayibiza ngokuthi yiBhokhimi. Banikela imihlatshelo kuJehova khonapho.

Ukungalaleli Lokwehlulwa

6 Emva kokuba uJoshuwa esebadedele abako-Israyeli, bahamba bayalithatha ilizwe, lowo lalowo endaweni eyilifa lakhe. 7 Abantu bamkhonza uJehova kuyo yonke impilo kaJoshuwa lakweyabadala abasala bephila ababeyibonile imisebenzi emikhulu uJehova ayeyenzele abako-Israyeli.

8 UJoshuwa indodana kaNuni, inceku kaJehova, wafa eleminyaka elikhulu letshumi.

9 Bamngcwaba emhlabeni oyilifa lakhe, eThimnathi Heresi elizweni lezintaba lako-Efrayimi, enyakatho kwentaba iGahashi.

10 Kwathi emva kokuba sonke isizukulwana leso sesiphelile, kwavela esinye isizukulwane esasingamazi uJehova kanye lalokho ayekwenzele u-Israyeli. 11 Lapho-ke abako-Israyeli benza okubi emehlweni kaJehova bakhonza uBhali. 12 Bamdela uJehova, uNkulunkulu waboyise, owayebakhuphe eGibhithe. Balandela njalo bakhonza onkulunkulu abehlukeneyo babantu ababehlala phakathi kwabo. Bamthukuthelisa uJehova 13 ngoba bamdela bakhonza uBhali labo-Ashithorethi.

14 Ekubathukutheleleni kwakhe uJehova abako-Israyeli wabanikela kubahlaseli ababaphangayo. Wabanikela ezitheni zabo ezazibahanqile, ababengasanelisi ukumelana lazo. 15 Zonke izikhathi lapho u-Israyeli waphuma ukuyakulwa, isandla sikaJehova samelana labo ukuba behlulwe, njengokufunga kwakhe kubo. Basebephakathi kohlupho olukhulu.

16 Kulapho-ke uJehova wabeka abahluleli ababahlengayo ezandleni zabahlaseli laba.

17 Belo bajinge bengabalaleli abahluleli babo kodwa baziphingisa kwabanye onkulunkulu babakhonza. Abenzanga njengaboyise, bona baphanga baphuma endleleni oyise ababehambe kuyo, indlela yokulalela imilayo kaJehova. 18 Ngesikhathi sonke lapho uJehova ebabekele umahluleli, wayemsekela umahluleli abahlenge ezandleni zezitha zabo lapho umahluleli esaphila; ngoba uJehova waba lesihawu kubo lapho bebubula ngaphansi kwalabo ababebacindezele bebahlukuluza.

19 Kodwa lapho umahluleli esefile, abantu babuyela ezindleleni zokuxhwala okudlula ezaboyise, belandela abanye onkulunkulu, babasebenzele njalo babakhonze, besala ukudela izenzo zabo ezimbi lezindlela zenkani.

20 Ngakho uJehova wamthukuthelela kakhulu u-Israyeli wathi, “Njengoba isizwe lesi sesephule isivumelwano engasimisela okhokho baso njalo kasingilalelanga, 21 kangisayikuxotsha phambi kwaso loba siphi sezizwe ezatshiywa nguJoshuwa ekufeni kwakhe.

22 Ngizasebenzisa zona ukuhlola u-Israyeli ngibone langabe bazayigcina indlela kaJehova bahambe kuyo njengokwenziwa ngokhokho babo.” 23 UJehova wayevumele ukuthi izizwe lezo zisale; kazixotshanga masinyane ngokuzinikela ezandleni zikaJoshuwa.